خالد شقوري يكتب: الثقافة.. أسلوب حياة الناس!!

طبعاً بعض الناس حيتوقعوا إني حأقول المعاني المعروفة والمتداولة لكلمة ثقافة.. وإنو الثقافة (هي كل مركب) والكلمة جاية من (ثقف السيف أي سنه وحد شفرته) وحاجات زي كده لكن حأتناول الأمر من زواية أخرى وبالبلدي الواااااضح (الثقافة هي أسلوب حياة الناس)

أسلوب.. يعني طريقة حياة.. يعني كل ناس عندهم أسلوب حياة مختلف من الآخرين ومرات بتكون في حاجات مشتركة.. يعني طريقة حياتهم في الأكل والشراب واللبس.. وبيشتغلو شنو وبيشتغلو كيف.. يفرحو كيف ويحزنو كيف.. ويعبرو كيف.. وطبعاً كل ناس عندهم طبايع مختلفة.. في ناس حارين وناس باردين.. وناس وسط.. وكل ناس عندهم عادات وتقاليد واعراف.. وكل ناس عندهم لهجة ولغة واسلوب كلام..

طيب السؤال البيطرح نفسو.. الفنون وين من الثقافة؟

طبعاً ده الكلام الجاب الكلام.. كتير من الناس بيفتكرو انو الغناء والشعر والتمثيل والكتابة  دي هي الثقافة.. والحقيقة هي وسائل ومواعين لتوصيل الثقافة..

وعشان أقرب الفهم اكتر.. ناخد مثال..

مثلاً لما الزول يسمع أغنية.. حيعرف انو الايقاع ده من وين.. وممكن من كلام الاغنية يعرف إنو حياة الناس دي عاملة كيف وبياكلو شنو وبيشربو  شنو ونوع زراعتهم شنو.. وطقوس مناسباتم كيف..

الأغنية بتنقل ليك اسلوب حياة الناس.. وحتى لغة الأغنية حتوريك القبيلة البتنتمي ليها الأغنية.

وبرضو الأغنية بتشكل عنصر من عناصر الثقافة.. إذا ارتبطت بالعمل والحركات الاستعراضية والرقص بتمثل طريقة الزراعة والحصاد وحركة السفر.. ومرات بنقدر نعرف  نوع الثروة الحيوانية العندهم لما نشوف رقصاتهم ولبسهم

والكلام ده ينطبق على كل الفنون الأخرى.. ومن خلال المسرح والدراما ممكن تتعرف على الشعوب ومن خلال اللوحات التشكيلية.. والروايات والاشعار برضو.. والعالم كلو عرف السودان من خلال روايات الطيب صالح.. كمثال

أقول انو الثقافة هي منهج  وأسلوب حياة الناس والفنون هي عنصر من عناصر الثقافة ووسيلة لتوصيل الثقافة

عبارة (نادي ثقافي رياضي اجتماعي) ما جاية.. لانو اجتماعي ورياضي ما بتوازي كلمة ثقافي لكنها جزء من ثقافي وممكن نقول.. نادي ثقافي (رياضي اجتماعي فني).

وعموما دي ما المشكلة الآن..

المشكلة.. انو عندنا وفي العالم العربي والافريقي من حولنا  وزارة اسمها وزارة الثقافة.. وبالاسم ده مفروض تكون مسئولة من التوثيق لحياة الناس بتفاصليها وتعبر عن مطلوبات حياة الناس  الموجودة في وزارات أخرى.. في الصناعة والتجارة والزراعة والشئون الاجتماعية والشئون الدينية والشباب وغيرها).

يعني حياة الناس في بلد.. ووزاراتها في بلد.. ومفترض وزارة  الثقافة تسمى وزارة الفنون والبحوث والآداب.. لأنها في كل العصور مهتمة بالجانب المنشطي

لمشكلة التانية في الفنانين البيعملو في حاجات غريبة.

حاجات غريبة كيف؟

أوضح ليكم..

قبيل قلنا.. الفنون هي وسائل ومواعين لتوصيل ثقافة الناس والتعريف بالشعوب

والفنانين عندنا اوبالاصح بعضهم بيعبرو بطريقتين يا اما يعبرو عن ثقافتنا وحياتنا باسلوب شرقى وغربي ماحقنا او باساليبنا الفنية بيعبرو عن ثقافات وحياة ناس تانين  مانحن وفي كل المجالات.. (الغناء والدراما والتقديم الاذاعي.. وغيرها)

وبصورة أبسط.. ممكن تلقى أغنية معمولة بموسيقى غربية وأداء غربي ومخارج الكلام خليجية ويكون بتتحدث عن السودان وناسو.. وعاداتو وتقاليدو.. وتراثو

ومن ناحية تانية تلقى أغنية بالأسلوب السوداني والإيقاعات السودانية.. وبتعبر عن قصة حب على الطريقة التركية.. أو المصرية.

بالتأكيد نحن ما عندنا أزمة ثقافة بالعكس نحن عندنا ثراء ثقافي وحياتنا  مليانة ومستفة.. وما في ناس في الدنيا عندهم ازمة ثقافة.. طالما عايشين وحيين بس عندنا أزمة في  أدوات توصيل  الثقافة  يعني (عطل فني).