شعب النضال الطويل
شعب النضال الطويل
صفاء الفحل
نضال الشعب السوداني ضد الديكتاتوريات العسكرية ممتد عبر الأجيال والملحمة أو قصة ثورة والتي تجسد ذلك النضال من خلال شعب رفض الظلم في أكتوبر وأبريل وديسمبر وهو يتطلع لإشراقة فجر جديد..
للشاعر الثائر هاشم صديق
قصيدة قصة ثورة
لما الليل الظالم طوّل
وفجر النور من عينّا اتحول
قلنا نعيد الماضي الأول
ماضي جدودنا الهَزَمُوا الباغي
وهدّوا قلاع الظلم الطاغي.
وفي ليلة وكنا حُشود بتصارع
عهد الظلم الشبَّ حواجز
شبَّ موانع
جانا هتاف من عِند الشارع
قسماً…قسماً
لن ننهار
طريق الثورة
هُدى الاحرار.
غضب الامه اتمدد نار
والكل يا وطني حشود ثوار
وهزمنا الليل
هزمنا الليل.
والنور في الآخر طل الدار
والعزة اتهادت للأحرار.
وطني أنحنا سيوف امجادك
ونحنا مواكب تفدى تُرابك
ولِسّه الشارع بِشهَد لينا
في يوم الغضبة حصاد ماضينا
مشينا نَعَطّر حقل الثورة
بِدَم نَفْدِيبُو بلادنا الحرة
وكان اكتوبر فجر الغضبة
كسرنا قيود الماضي الصَعَبة
لما مشينا مواكب صَامده
تهدر- وتغلى … وتهتف راعده:
الرصاص لن يفنينا.
وسال الدم في أرض الوادي
فَدينا النور بالروح يا بلادي
وكانت صفحة حكاها العالم
وفجر اكتوبر طَلّ وسَالَم
كان في الجامعة موكب هادر
صمَّم يجلى الليل السّادر
وكان الليل السادر غادر
فجّر غدروا سموم دخان
ورُصاص من صوته صِحَا السودان
والشعب الثائر
صمّم هادر
يصرع ليلنا الداجي الطَّوَّل
وكان القرشي شهيدنا الاول
وما اتراجَعنا
حلفنا نقاوم ليلنا وسِرنَا
نذرنا الروح ومَسَكْنَا دَرِبنَا
للشمس النايرة قطعنا بحور
حلفنا نموت أو نلقى النور
وكان في الخطوة بنلقي شهيد
بي دمه بِيِرسُم فجر العيد.
يا اكتوبر
أنِحْنا العِشنا ليالي زمان
في قيود ومظالم وويل وهوان
كان في صدورنا غضب بركان
وكنا بنقسم بالأوطان
نَسَطَّر اسمك يا سودان
بدمانا السّالت راويه الساحة.
وحلفنا نسير ما نْضوق الراحة
شهرنا سيوف عِصيانّا المدني
إيد في ايد حلفنا نقاوم
ما بنِترْاَجع وما بِنسَاوم
بينّا وبينك تار يا ظالم
خُطانا تسير في درب النصر
هتافنا يدَوّى يهز القصر
كسرنا حواجز ..أزِلنا موانع
صفنا واحد
عامل. وطالب..زارع وصانع
وهزمنا الليل
هزمنا الليل
والنور في الآخر طل الدار
والعِّزه اتهادت للأحرار
يا ساحة القصر.. يا حقل
ويا واحهَ بتَحَضِن روح(نَصّار)
روينا ورودك دم ثوار
وشتَلنا فضاك هتاف أحرار
خَطّينا ترابك احرف نايرة
بتحكي سطور ايامنا الثايرة.
وشلنا الشهداء مشينا ونهتف
وجرح النار في قلوبنا بينزف
سَجّينا الشُهداء وجينا نقاوم
ما بنِتراجع وما بِنساوم
وفجأة ونحنا صفوف بتصمم
زغرد فجر الثورة الحالم
والنور في الآخر طل الدار
والعزة اتهادت للأحرار
قسماً..قسماً يا اكتوبر
نحمي شعارك
ونجنى ثمارك
ونرفع راية الثورة الغالية
عالية ترفرف فوق السارية
عليها شعار الثورة الأكبر
رسُمه النادر زاهي واخضر
ولِسّه بنقسم يا اكتوبر
لما يطل في فجرنا ظالم
نحمى شعار الثورة نقاوم
نبقى صفوف تمتدّ وتهتف
لما يعود الفجر الحالم
ولسه بنقسم
والثورة مستمرة ..
وقصاص حتمي ..
والرحمة لكل من قدم روحه رخيصة من أجل الإنعتاق ..
