مع المغتربين في الإجازات

عرض المادة
مع المغتربين في الإجازات
1293 زائر
11-06-2015

أعجبتني هذه الرسالة على الواتساب فأحببت مشاركتكم إياها وأوعى واحد فيكم يقول لي قديييمة أو معتتة وحركاتكم البتعملوها في الواتساب ديك، تقول:

*طبعاً الأيام دي خلاص موسم عودة المغتربين من دول الخليج للإجازة السنوية ..
السادة المغتربين نرحب بيكم في بلدكم الثاني السودان وبالجد رمضان بيكم أحلى واللمة معاكم ليها طعم خاص ومشتاقين ليكم
عشان نتفق ونعمل ليكم برامج حلوة في حاجات دايركم تعرفوها..
أولاً : نحن لسه زي ما خليتنا ما منظمين وبلدنا زي ما خليتها ما عندنا جديد .. يعني ما تجي تقول لينا انتو هنا ليه ما منظمين وتبدأ تسرد في القصص نحن هناك عندنا وعندنا وتقعد تمعط فينا.
ثانياً : لو شفت ليك وساخة في الشارع ما تجي تقول لينا ليش بلدكم وسخانة ونحن هناك عربية الوساخة من الفجر بتغسل الشارع وتنضفوا وتريحو .. ارحمنا يا رجال

ثالثاً: عارفنك أكبر سياسي في العالم فيا ريت تنقطنا بسكاتك في السياسة وما تدينا أي اقتراحات..عارفين لو كنت قعدت كانت كل مشاكل السودان اتحلت..
رابعاً: يمنع استخدام جملة (بكم عندكم هذا.. نحن عندنا هذا بسبعين ريال، الوضع الاقتصادي زي ما خليتو.
خامساً يا ريت ما تسألنا بكم الريال اليوم؟ أمشي السوق العربي وفك الخمسين ريال البتسأل منها من جيت... !
سادساً : ما تنظّر لينا في الاستثمار وأحسن المشاريع الاستثمارية في السودان شنو؟ وتحسس الشعب انو عندك طيارات داير تشغلها في خط القاهرة الخرطوم هثرو.
وفي النهاية تجي تقول لينا البلد كلها حرامية، عندك قروش ختها وديعة في البنك.
وسابعاً : ما تحسسنا انك في معاناة في الغربة وأننا ما عارفين حاجة.. وانو القروش ما كل حاجة.
ثامناً : وانت مسافر في الأيام الأخيرة ما توعدنا بإقامات وشغل وكلام فارغ زي ده عشان ترجع بي موبايلك، شايلنو شايلنو.
*وفي حاجات عايزاكم تنتبهو ليها
أول حاجة الصابون والمعجون والسفنجات والطواقي والسبح وريحة مكة هنا عندنا راقدات ومفروشات في الشارع وارخص من الحتجيبوهم معاكم.
تاني شي: ما في داعي للدلاقين الزي دي، بس أي حاجة مكتوب فيها

made in china خليها في محلها.
وأوعاك تقول لي جيبي الدشاشة، ياها السفنجة حقتك الخليتها زمان لميناها ليك في المخزن (ذكرى) ونخرتها مقطوعة وداقنها بمسمار! وكل فردة لونها براهو ! بلا دشاشة بلا سحساحة معاك!
أها كمان ما تقعد تتفلسف لينا في السياسة وتعمل لينا فيها الامام الصادق المهدي وتعمل لينا فيها انك لو كنت قاعد كان عملت ثورة وتغيير وهلمجرا.. يا هو داك الشارع يلا امشي ورينا الثورة كيف.
وما تقول لينا في السعودية البنزين أرخص من الموية، شيل معاك موية النيل وبيعها هناك شوف تجيب ليك كم ريال وريحنا من التنظير يا ريال !
أها كمان ما تغش ليك واحد وتقول ليهو بجيب ليك إقامة ولما ارجع برسل ليك فيزا أو تقول ليهو الإقامات للسودان الأيام دي موقوفة ، خليك واضح وما تخلي الناس تعشم فيك ساي وتطلع كضاب.
بعدين يا خ عندك عطر جميل كدا غايتو عاجبني حتى لو القزازة باقي فيها شوية برضو حنصادرو منك غصباً عنك.
أها البدلة والكرفتة

دي عوارة ياخ..الدنيا سخانة .. أقشر ليك بجلابية او على الله وما تخلي الناس يتفرجوا فيك يقولو دا شغال في بنك ولا محامي خانق رقبتو بالليل دا.

أهم حاجة أوعاك تعمل فيها (شفت) ومفتح وحويط وتمشي تشتري ليك (بيت) أو واطة من غير ما تكلم ناس البيت، والله الشفوت بتاعين الأراضي يركبوك التونسية ويخلوا خشمك ملح ملح، بلا شهادة بحث بلا ورقة مبايعة معاك بلا وثقتها عند محامي صاحبي.
لو عازم ليك ناس قبال تعزم زول اقعد مع ناس البيت وشوف الطلبات والعدد عشان نستعد، ما تعزم ساي وتقول لينا هناك البقالة قريبة في دقيقتين تشتري المقاضي كلها! هنا اسمها الحاجات والبقالة اسمها الدكان وغير الجردقة والعطرون والشاي والبن ما فيهو شي.
ولمن تجو بصالة القدوم خليكم طبيعيين شنو بتجو رافعين الراس وداخلين بفلهمة حركاتكم دي نحن بنضحك فيها وظاهره.

نتمنى ليكم إقامة طيبة ويلا انبسطو في شارع النيل .

   طباعة 
0 صوت
التعليقات : تعليق
« إضافة تعليق »
اضافة تعليق
اسمك
ايميلك

/500
تعليقك
4 + 9 = أدخل الكود
روابط ذات صلة
روابط ذات صلة
المادة السابقة
المواد المتشابهة المادة التالية
جديد المواد
جديد المواد
إعلام المؤسسات - هويدا حمزة
عليك الله أقعدي! - هويدا حمزة
دوس لايك - هويدا حمزة