كوميديا الأكاديمية!

عرض المادة
كوميديا الأكاديمية!
8792 زائر
01-12-2014

المسرح يضج بالحضور.. نسبة مشاهدة عالية من الجماهير العاشقة للمسرحيات الكوميدية.. مسرح أكاديمية تقانة كرة القدم يحدثك من مدخله وحتى مكتب علي الأمين المسؤول عن التسجيلات عن مسرحية هزلية مضحكة حد البكاء!

جمالية المشهد تبدأ من خارج الأسوار والجماهير تتابع القادمين بالعربات المظللة فتندفع نحوهم في انتظار نجم شهير او أداري كبير أو وعد بإعادة محبوب الجماهير.. البعض يهتف مناصرًا بعد ذلك وبالتأكيد فإن الهتافات العدائية موجودة وتداخل الأصوات والألفاظ يجعلك تستمتع ببداية المسرحية قبل الدخول للمسرحية!

كوميديا المكان أجمل ما في المسرحية فأنت في الخارج تستمع إلى نقاشات عفوية من الجماهير البسيطة وفي الداخل فإن (سوق النخاسة) يضج بالسباب.. بي عشرة؟ لي بي خمسة.. يا خي ده لاعب منتخب.. وده جاي من السعودية.. ما عندنا كاش .. خلاص جيب موبايل بشريحتين أو موبايلين بشريحة!

وفي جانب آخر في سوق تاني بتاع نسوان.. ذكرونا أيام شبابنا في أم درمان.. بعض الفتيات يفرشن صور لاعبين معروضين للبيع.. عندي لاعب جبتو معاي من دبي.. وواحد من الصين.. وفي مجموعة من إثيوبيا وارتريا.. عندنا تخفيضات في اللاعبين صغار السن وممكن نبيع بالتقسيط بس لازم واحد يضمنك!

يلا ندخل علي المسرح ذاتو.. غرفة التسجيلات... لافتات كبيرة مكتوب عليها.. مكتب التجنيس.. مكتب الإعارة.. مكتب الخانات الشاغرة.. مكتب إبداء الرغبة.. الأسعار تبدأ من ثلاثة ملايين إلى ما لا نهاية!

لو ما كنت مركز ما بتقدر تكتب لي جريدتك الخبر الصحيح.. ممكن اللاعب يوقع لأهلي شندي وينتقل في نفس اللحظة للرابطة كوستي ويمشي معار للمهدية! لازم تركز عشان تعرف.. جمعة جنوبي وسوداني وجايبنو ناس الهلال وحيوقع في كوبر! وأوكرا غاني وأجنبي جايبنو ناس المريخ ولابس شعار المريخ وبوقع لأهلي الخرطوم! مش قلت ليك لازم تركز! الاتحاد بقول ليك ما في حراس أجانب.. جمعة سوداني وجمال سالم سوداني ومكسيم سوداني.. انت عارفهم ما سودانيين.. ما تركز شديد هنا بس ركز في المسرحية ذاتها! ولو قعدت تفكر المسرحية كلها بتفوتك انت بس تتفرج وكأنك بتتفرج في فيلم هندي! تتخيل أي حاجة بتحصل.. هنا البطل ما بموت.. ممكن الكورة ذاتها تموت لكن بطل ما يموت يا فرده!

بتقرأ في اللوائح بتلقى النادي عندو ثلاثة أجانب.. تشوف الكشف تلقاهم عشرة.. عااادي.. والكشف ذاتو قانونياً في عدد لاعبين محدد بس مع الأهلي شندي ما حتقدر تغمض عينيك.. ممكن الكشف يشيل تلاتين.. اربعين خمسين! شيء اعارة وشيء نادي صديق وشيء اندية تأهيلي وشيء أندية ولايات!

بلد ما فيها دولارات! كيف ما فيها دولارات.. لو عايز تطمئن على الاقتصاد السوداني تعال اتفرج في مسرحية الأكاديمية.. بتلقى هنا العمال الأجانب بالكوم.. يعني كيف البلد تعيش في ضائقة مالية واقتصادية وفيها عمال أجانب بالعددية دي.. ومرتبات بالدولار.. كمية من اللاعبين الأجانب تتخيل روحك في الدوري الانجليزي..

المسرحية شغالة والعمود مفروض يمشي المطبعة.. المعز محجوب احتمال يمشي المريخ واحتمال يجيبو ناس المريخ ويمشي أم بده واحتمال يسكن نمرة 2.. والمطبعة عايزة العمود والجزائري القالوا وقع للمريخ في خبر كان.. قالوا وقع ابداء رغبة! ما فاهمين حاجة.. نحن ذاتنا ما فاهمين.. في عقبات في طريق العقبي.. عقبات شنو يا خالد؟ الزول ده مش وقع في السفارة! أنا عارف.. احتمال ورق التأشيرة كمل.. ولا ما عندو كرت حمى صفراء ! والله انتو عايزين ليكم كرت أحمر! قالوا وقع إبداء رغبة .. واها الرغبة الحصل فيها شنو؟ واحد جزائري سأل بتاع العلاقات العامة في السفارة في الجزائر.. قال لي إبداء رغبة يعني شنو؟ قال لي يعني فتح خشم! الجزائري ضحك قال إنا إبداء رغبة ما عرفتها تقول لي فتح خشم! قال لي يعني أهل العريس فتحوا خشمكم!

المسرحية شغالة والجماعة عايزين العمود عشان المطبعة.. قلت المسرحية انتهت طلع إنو أوغستين أوكرا الفي أول المسرحية مشى الأهلي احتمال كبير يجي من أهلي الخرطوم راجع المريخ ! بس أوعه يوقع في المريخ بي فنلة الأهلي !

نشوفكم بكره عشان المطبعة!!!!

   طباعة 
0 صوت
التعليقات : تعليق
« إضافة تعليق »
اضافة تعليق
اسمك
ايميلك

/500
تعليقك
6 + 4 = أدخل الكود
روابط ذات صلة
روابط ذات صلة
المادة السابقة
المواد المتشابهة المادة التالية
جديد المواد